ഗിനി-ബിസൗവിൽ രാഷ്ട്രീയ പ്രവർത്തകനെ മർദിച്ചു കൊന്ന നിലയിൽ കണ്ടെത്തി

ഗിനി-ബിസൗവിലെ പ്രമുഖ രാഷ്ട്രീയ — മനുഷ്യാവകാശ പ്രവര്‍ത്തകനായ വിഗാരിയോ ലൂയിസ് ബാലന്തയെ കൊല്ലപ്പെട്ട നിലയിൽ കണ്ടെത്തി. തലസ്ഥാനമായ ബിസൗവിൽ നിന്ന് 30 കിലോമീറ്റർ അകലെയുള്ള ഉൾപ്രദേശത്താണ് അദ്ദേഹത്തിന്റെ മൃതദേഹം ഉപേക്ഷിക്കപ്പെട്ട നിലയിൽ കണ്ടെത്തിയത്. ‘പോ ഡി ടെറ’ എന്ന വിപ്ലവ പ്രസ്ഥാനത്തിന്റെ നേതാവും ഗിനി-ബിസൗവിലെ സൈനിക ഭരണകൂടത്തിന്റെ കടുത്ത വിമർശകനുമായിരുന്നു 35‑കാരനായ ബാലന്ത. മൃതദേഹത്തിൽ ക്രൂരമായ മർദ്ദനത്തിന്റെയും പീഡനത്തിന്റെയും അടയാളങ്ങൾ കണ്ടെത്തിയിട്ടുണ്ട്. തലയിൽ വെടിയേറ്റതായും റിപ്പോർട്ടുകളുണ്ട്. 

2025 നവംബറിൽ നടന്ന അട്ടിമറിയിലൂടെ അധികാരം പിടിച്ചെടുത്ത സൈനിക ഭരണകൂടത്തിനെതിരെ ബാലന്ത നിരന്തരം ശബ്ദമുയർത്തിയിരുന്നു. കൊലപാതകം രാഷ്ട്രീയ പ്രേരിതമാണെന്ന് പോ ഡി ടെറയും മറ്റ് പ്രതിപക്ഷ പാർട്ടികളും ആരോപിക്കുന്നു. ബാലന്തയുടെ സംസ്കാരത്തിന് പിന്നാലെ ബിസൗവിൽ വലിയ തോതിലുള്ള പ്രതിഷേധ പ്രകടനങ്ങൾ നടന്നു. നീതി ആവശ്യപ്പെട്ട് തെരുവിലിറങ്ങിയ ജനങ്ങളെ പിരിച്ചുവിടാൻ പോലീസ് കണ്ണീർവാതകവും ലാത്തിയും പ്രയോഗിച്ചു. 

ക്രൂരമായ കൊലപാതകത്തിൽ ഞെട്ടിപ്പോയെന്നും, ഇതിൽ നിഷ്പക്ഷമായ അന്വേഷണം വേണമെന്നും ഐക്യരാഷ്ട്രസഭ ആവശ്യപ്പെട്ടു. രാജ്യത്ത് ജനാധിപത്യപരമായ അവകാശങ്ങൾ ഇല്ലാതാകുന്നതിന്റെ സൂചനയായാണ് ഈ കൊലപാതകത്തെ മനുഷ്യാവകാശ സംഘടനകൾ വിലയിരുത്തുന്നത്.