മദ്യപിക്കാത്തവരിലും വർധിക്കുന്ന കരൾ രോഗം

കരൾ രോഗം മദ്യപാനവുമായി അടുത്ത ബന്ധം പുലർത്തിയിരുന്നു. കരൾ രോഗത്തിലേക്ക് നയിക്കുന്നത് മദ്യപാനമാണ് എന്നായിരുന്നു വ്യാപകമായ ധാരണ. എന്നാൽ, ഇന്ന് അതല്ല യഥാർത്ഥ ചിത്രം. മദ്യം അപൂർവമായി മാത്രം ഉപയോഗിക്കുന്നവരിലോ അല്ലെങ്കിൽ ഒട്ടും ഉപയോഗിക്കാത്തവരിലോ കരൾ രോഗം കൂടുതലായി കണ്ടെത്തുന്നുണ്ട്. ‘മെറ്റബോളിക് ഡിസ്‌ഫംഗ്ഷൻ-അസോസിയേറ്റഡ് സ്റ്റീറ്റോട്ടിക് ലിവർ ഡിസീസ്’ (എംഎഎസ്എൽഡി) എന്ന് വിളിക്കപ്പെടുന്ന ഈ അവസ്ഥ ലോകമെമ്പാടും സാധാരണമായ കരൾ രോഗങ്ങളിൽ ഒന്നായി മാറിയിരിക്കുന്നു. 

എന്താണ് എംഎഎസ്എൽഡി

അമിതമായി മദ്യപിക്കാത്ത വ്യക്തികളുടെ കരളിൽ അമിതമായി കൊഴുപ്പ് അടിഞ്ഞുകൂടുമ്പോഴാണ് എംഎഎസ്എൽഡി ഉണ്ടാകുന്നത്. ശാരീരിക അധ്വാനമില്ലായ്മ, സംസ്കരിച്ച ഭക്ഷണങ്ങളും പഞ്ചസാരയും അടങ്ങിയ ആരോഗ്യകരമല്ലാത്ത ഭക്ഷണക്രമം, അമിതവണ്ണം, പ്രമേഹം, ഉയർന്ന കൊളസ്ട്രോൾ തുടങ്ങിയ ആധുനിക ജീവിതശൈലീ ഘടകങ്ങളാണ് ഇതിന് പ്രധാന കാരണം. ശരീരത്തിന് ആവശ്യമായതിനേക്കാൾ കൂടുതൽ കലോറി, പ്രത്യേകിച്ച് ശുദ്ധീകരിച്ച കാർബോഹൈഡ്രേറ്റുകളിൽ നിന്ന് ലഭിക്കുമ്പോൾ, ശരീരം ആ അധിക കലോറിയെ കൊഴുപ്പാക്കി മാറ്റുന്നു. ഇത് കാലക്രമേണ കരളിൽ അടിഞ്ഞുകൂടുന്നു. ഈ രോഗത്തിന്റെ ഏറ്റവും വലിയ വെല്ലുവിളികളിലൊന്ന് ഇത് നിശബ്ദമായി വികസിക്കുന്നു എന്നതാണ്. ആദ്യഘട്ടങ്ങളിൽ മിക്കവരിലും ലക്ഷണങ്ങളൊന്നും കാണാറില്ല. പലപ്പോഴും, സാധാരണ ആരോഗ്യ പരിശോധനകൾക്കിടയിൽ കരൾ എൻസൈമുകളുടെ അളവിലോ ഇമേജിങ് പരിശോധനകളിലോ മാറ്റങ്ങൾ കാണുമ്പോഴാണ് ഇത് യാദൃച്ഛികമായി കണ്ടെത്തുന്നത്. എന്നാൽ ആദ്യഘട്ടങ്ങളിലെ ഫാറ്റി ലിവർ രോഗം പലപ്പോഴും സുഖപ്പെടുത്താവുന്നതാണ് എന്നത് ആശ്വാസകരമായ വാർത്തയാണ്. കോശങ്ങളിൽ അമിതമായി കൊഴുപ്പ് അടിഞ്ഞുകൂടുന്നതിനാൽ കരളിനെയാണ് ഇത് പ്രധാനമായും ബാധിക്കുന്നത്. കാലക്രമേണ, ഇത് നീരുണ്ടാകുന്നതിലേക്കും വടുക്കൾ എന്നിവയ്ക്കും കാരണമായേക്കാം. സിറോസിസിലേക്കും നയിച്ചേക്കാം. ഇത് ശരീരത്തിലെ വിഷാംശങ്ങൾ നീക്കം ചെയ്യാനും സുപ്രധാന പ്രോട്ടീനുകൾ ഉല്പാദിപ്പിക്കാനുമുള്ള കരളിന്റെ ശേഷിയെ തടസപ്പെടുത്തുന്നു. 

പ്രധാനമായും ശ്രദ്ധിക്കേണ്ട കാര്യം, ഈ രോഗം അമിതഭാരമുള്ളവരിൽ മാത്രം ഒതുങ്ങുന്നില്ല എന്നതാണ്. സാധാരണ ശരീരഭാരമുള്ളവരിലും ഉപാപചയ പ്രശ്നങ്ങളും ഫാറ്റി ലിവറിന് കാരണമാകാം. ഇതിനെ “ലീൻ ഫാറ്റി ലിവർ” എന്ന് വിളിക്കുന്നു. ശരീരഭാരം മാത്രമല്ല, മെറ്റബോളിക് ആരോഗ്യവും ഇതിൽ നിർണായക പങ്കുവഹിക്കുന്നുണ്ടെന്ന് ഇത് എടുത്തുകാണിക്കുന്നു. പലർക്കും ഈ രോഗം ഗുരുതരമല്ലാത്ത അവസ്ഥയിൽ തുടരാമെങ്കിലും, ചിലരിൽ ഇത് കടുത്ത വീക്കത്തിലേക്കും കരളിന്റെ നാശത്തിലേക്കും നയിച്ചേക്കാം. ചികിത്സിച്ചില്ലെങ്കിൽ കാലക്രമേണ ഇത് സിറോസിസ്, ലിവർ ഫെയിലിയർ അല്ലെങ്കിൽ കരൾ കാൻസർ എന്നിവയിലേക്ക് നയിക്കാം. ആദ്യകാല ലക്ഷണങ്ങൾ ഉണ്ടെങ്കിൽ തന്നെ അവ ക്ഷീണം, തളർച്ച അല്ലെങ്കിൽ വയറ്റിലെ അസ്വസ്ഥത എന്നിങ്ങനെയാകാം. അതുകൊണ്ട് തന്നെ അവ എളുപ്പത്തിൽ അവഗണിക്കപ്പെട്ടേക്കാം. മാറിക്കൊണ്ടിരിക്കുന്ന ജീവിതശൈലി മൂലം അമിതവണ്ണവും പ്രമേഹവും വർധിച്ചുവരുന്ന ഇന്ത്യയെപ്പോലുള്ള രാജ്യങ്ങളിൽ ഈ അവസ്ഥയുടെ വർധനവ് ആശങ്കാജനകമായ ഒരു പൊതുജനാരോഗ്യ പ്രശ്നമാണ്. കരളിനെ ബാധിക്കുന്നതിനുപുറമെ, ഈ അവസ്ഥ ഹൃദ്രോഗ സാധ്യതയുമായും മറ്റ് മെറ്റബോളിക് പ്രശ്നങ്ങളുമായും ബന്ധപ്പെട്ടിരിക്കുന്നു. 

ആദ്യഘട്ടങ്ങളിലെ ഫാറ്റി ലിവർ പലപ്പോഴും മാറ്റിയെടുക്കാമെന്നത് പ്രതീക്ഷ നൽകുന്ന കാര്യമാണ്. സമീകൃത ആഹാരം കഴിക്കുക, കൃത്യമായി വ്യായാമം ചെയ്യുക, ആരോഗ്യകരമായ ശരീരഭാരം നിലനിർത്തുക, രക്തത്തിലെ പഞ്ചസാരയുടെയും കൊളസ്ട്രോളിന്റെയും അളവ് നിയന്ത്രിക്കുക തുടങ്ങിയ ലളിതമായ ജീവിതശൈലീ മാറ്റങ്ങൾ വലിയ മാറ്റമുണ്ടാക്കും. ചുരുക്കത്തിൽ, കരൾ രോഗം എന്നത് ഇനി മദ്യപാനം കൊണ്ട് മാത്രം ഉണ്ടാകുന്ന ഒന്നല്ല. നിശബ്ദവും എന്നാൽ വർധിച്ചുവരുന്നതുമായ ഈ രോഗാവസ്ഥ തടയാൻ അവബോധം, നേരത്തെയുള്ള രോഗനിർണയം, ജീവിതശൈലീ മാറ്റങ്ങൾ എന്നിവ അത്യാവശ്യമാണ്.