രണ്ടാമതും അമ്മയാകാനൊരുങ്ങി ദീപിക പദുക്കോൺ; സന്തോഷ വാര്‍ത്ത പങ്കുവെച്ച് താര ദമ്പതികള്‍

ബോളിവുഡ് താരദമ്പതികളായ ദീപിക പദുക്കോണും രൺവീർ സിംഗും വീണ്ടും മാതാപിതാക്കളാകുന്നു. ഞായറാഴ്ച സമൂഹമാധ്യമത്തിലൂടെയാണ് ദീപിക ഈ സന്തോഷവാർത്ത ആരാധകരുമായി പങ്കുവെച്ചത്. ദമ്പതികളുടെ ആദ്യ മകൾ ദുഅ പദുക്കോൺ സിംഗിന്റെ ഒരു മനോഹരമായ ചിത്രം പങ്കുവെച്ചുകൊണ്ടായിരുന്നു പ്രഖ്യാപനം. ഗർഭപരിശോധനാ ഫലം പോസിറ്റീവാണെന്ന് കാണിക്കുന്ന കിറ്റ് കൈയ്യിലേന്തിയിരിക്കുന്ന ദുഅയുടെ ചിത്രമാണ് ദീപിക പോസ്റ്റ് ചെയ്തത്. രൺവീറിന്റെയും ദീപികയുടെയും കൈകൾ മകളെ ചേർത്തുപിടിച്ചിരിക്കുന്നതും ചിത്രത്തിൽ കാണാം. പോസ്റ്റിന് താഴെ നിരവധി ബോളിവുഡ് താരങ്ങളും ആരാധകരും ആശംസകളുമായി എത്തി. 

2018ൽ വിവാഹിതരായ ദീപികയ്ക്കും രൺവീറിനും 2024 സെപ്റ്റംബറിലാണ് ആദ്യ മകൾ ദുഅ ജനിച്ചത്. തങ്ങളുടെ പ്രാർത്ഥനകൾക്കുള്ള ഉത്തരമാണ് മകളെന്ന അർത്ഥത്തിലാണ് അവർ ദുഅ എന്ന് പേരിട്ടത്. നിലവിൽ സിദ്ധാർത്ഥ് ആനന്ദ് സംവിധാനം ചെയ്യുന്ന ‘കിംഗ്’ എന്ന ചിത്രത്തിന്റെ തിരക്കിലാണ് ദീപിക. ഷാരൂഖ് ഖാനും സുഹാന ഖാനുമാണ് ഈ ചിത്രത്തിൽ പ്രധാന വേഷങ്ങളിൽ എത്തുന്നത്. രൺവീർ സിംഗിന്റേതായി അടുത്തിടെ പുറത്തിറങ്ങിയ ‘ധുരന്ധർ: ദി റിവഞ്ച്’ ആഗോളതലത്തിൽ 1,700 കോടിയിലധികം രൂപ കളക്ട് ചെയ്ത് വൻ വിജയമായി തുടരുകയാണ്. ജയ് മേത്തയുടെ ‘പ്രളയ്’ ആണ് രൺവീറിന്റെ അടുത്ത ചിത്രം.